خرقا للحظر المفروض على المدونة

خرقا للحظر المفروض على المدونة علشان الامتحانات حبيت أقول كلمتين على السريع
1-فيه اقتراح إن كل الناس تصلي ركعتين قيام يوم الاتنين القادم الساعة 12 بالليل
من باب " عبادة الهرج كهجرة إليّ " كما في الحديث
وأنا شايف إنها فكرة كويسة وقابلة للتنفيذ وياريت الناس تفكر فيها

2- موقع ملتقى الإخوان عاملين حملة مع هيئات تانية للإفراج عن الإخوان المحالين لمحاكمة عسكرية
الحملة إسمها : أفرجوا ... الحملة الدولية للإفراج عن الإصلاحيين في مصر
وده موقع الحملة
وأنا عامل التصميم ده على السريع كده مشاركة في الحملة دي
وأحب أعرف رأيكم في التصميم


3- امتحاني السبت بعد القادم 5 يناير
فمش تنسو أخوكم من الدعاء ضروري جدا جدا جدا

4- موقع المركز الفلسطيني للإعلام عاملين حملة لفك الحصار عن غزة إسمها : يا أهلنا في غزة نحن معكم
وده لوجو الحملة علشان اللى يحب يصمم أو ينشر الفكرة


جزاكم الله خيرا
والسلام عليكم ورحمة الله بركاته

8- عشرون شمعة من عمر حماس

ومن الآن

وحتى يوم

25/1/2008

نعلن إغلاق المدونة لسببين

الأول : الامتحانات وهندسة وانتو عارفين اللى فيها

والثاني : إن الكمبيوتر باظ أصلا وأنا بكتب الكلام ده من على كمبيوتر واحد صاحبي

علشان كده أنا مضطر أقف لحد ما الامتحانات تخلص ونصلح الكمبيوتر إن شاء الله

دعواتكم

والسلام عليكم ورحمة الله وبركاته

7- عباس - أحمد مطر

عباس وراء المتراس
يقظ منتبه حساس
منذ سنين الفتح يلمع سيفه
ويلمع شاربه أيضا، منتظرا محتضنا دفه
بلع السارق ضفة
قلب عباس القرطاس
ضرب الأخماس بأسداس
(بقيت ضفة)

لملم عباس ذخيرته والمتراس
ومضى يصقل سيفه

عبر اللص إليه، وحل ببيته
(أصبح ضيفه)
قدم عباس له القهوة، ومضى يصقل سيفه
صرخت زوجة عباس: " أبناؤك قتلى، عباس
ضيفك راودني، عباس ،
قم أنقذني ياعباس

عباس ــ اليقظ الحساس ــ منتبه لم يسمع شيئا
(زوجته تغتاب الناس)
صرخت زوجته : "عباس، الضيف سيسرق نعجتنا
قلب عباس القرطاس ، ضرب الأخماس بأسداس
أرسل برقية تهديد
فلمن تصقل سيفك ياعباس" ؟"
(لوقت الشدة)
.إذا ، اصقل سيفك ياعباس

إضافة من عندي

فاصقل سيفك يا عباس

وبه فاضرب فتيان حماس

6-دعوتنا تجمع ولا تفرق

يقول تعالى : ( واعتصموا بحبل الله جميعا ولا تفرقوا واذكروا نعمة الله عليكم إذ كنتم أعداء فألف بين قلوبكم فأصبحتم بنعمته إخوانا وكنتم على شفا حفرة من النار فأنقذكم منها كذلك يبين الله لكم آياته ) آل عمران
في ضوء هذه الآية الكريمة أتعجب كثيرا من أناس يصرون على التفريق بين الإخوان المسلمين وأنصار السنة المحمدية أو السلفيين
بعض منهم ربما يكون من العوام الذين لا يفقهون كثيرا في فكر الدعوة الإسلامية بأسماءها المختلفة سواء كانت الإخوان أو لسلفيين أو غيرهم .
ولكن البعض الآخر وللأسف الشديد ممن فقهوا وتعلموا وتفهموا أصول هذه الدعوات ومناهجها ومفاهيمها ومدى قربها أو بعدها عن أسس وأصول
وقواعد الإسلام .
الإخوان يقولون : دعوتنا سلفية تدعوا إلى العودة إلى القرآن والسنة بفهم السلف الصالح
والسلفيون يقولون : نحن أتباع السلف الصالح نسير على نهجهم ونخطو خطاهم
ورغم ذلك هناك كثيرون يصرون على التفريق بين الإخوان والسلفيين .
عنوان هذه الكلمات : دعوتنا تجمع ولا تفرق
وأنا وإن كنت من الإخوان فإن ما أقصده بدعوتنا هو الدعوة الإسلامية بكل من ينتسب إليها ويعمل من أجلها وليست هذه الدعوة أبدا حكرا على فريق
واحد حتى وإن كان هذا الفريق هو الإخوان المسلمين .
وأجدني في هذه المرحلة مضطرا للحديث عن امر ربما قد مضى من عدة أسابيع ولكن أود أن أوضح ما أراه من خلاله
كلنا يعرف الشيخ وجدي غنيم وكلنا يعرف طريقته في الإلقاء والخطابة
منذ ما يزيد عن خمسة عشر عاما تحدث الشيخ في إحدى خطبه وقال أنه سمع عن مظاهرة في الكويت تطالب بإباحة اللواط .
ومنذ عدة أسابيع اكتشف أحد الإخوة السلفيين هذا الأمر وتحولت هذه الكلمات - التى اعتذر عنها الشيخ - إلى أنه يطعن في أخلاقيات الكويت وأهلها
وكاد الأمر أن يتحول - أو هو تحول بالفعل - إلى أزمة دبلوماسية لأن الكويت طلبت من البحرين عدم إيواء هذا الشخص الذي يهاجم الكويت وهددت
الكويت بقطع العلاقات إذا لم يطرد الشيخ من البحرين وعليه فقد تم طرد الشيخ بالفعل من البحرين .
لن أعلق على أن كل إنشان يخطئ حتى وإن كان الشيخ وجدي غنيم وله كل الاحترام
ولن أعلق على هذه الكلمات التي تم تفسيرها بشكل خاطئ ربما بحسن نية وربما بسوء نية
ولن أعلق على أن هذه الكلمات قيلت من أكثر من خمسة عشر عاما ولم نبحث عنها إلا الآن
ولكن ما أريد أن أتوقف عنده قليلا هو سبب هذا الهجوم
الشيخ وجدي غنيم من دعاة الإخوان المسلمين وقد يكون بين الإخوان والسلفيين في الكويت خلافات فقهية أو حتى سياسية .
ولكن هذا الخلاف يجب ألا يكون مبررا لعداء شخصي ينشأ بين الإخوان والسلفيين ويسعى كل فريق منهم لمحو الآخر من الوجود .
الله عز وجل يقول : (( تحسبهم جميعا وقلوبهم شتى هم العدو قاتلهم الله ))
هذا ليس حديثا عن الدعاة إلى الله ولكن هو حديث عن اليهود فما لنا نحن الدعاة إلى الله نتشبه باليهود
وحتى أكون محقا فإن هذا الاتجاه للتفريق بين الإخوان والسلفيين ليس فقط عند السلفيين بل هو عند كثير من الإخوان .
لابد أن نميز بين الإخوان والسلفيين
لابد أن نعلن أن هذا الدرس في مسجد الإخوان
ولابد أن نعلن أن هذا المسجد هو مسجد أنصار السنة وممنوع على الأخ أن يصلي فيه
هذه كلمات نسمعها في كثير من الأحيان من كثير من الإخوان
وهذه الكلمات في رأيي قد جانبها الصواب
إذا كنا نتعامل مع الوفديين والاشتراكيين والقوميين على ما في أفكارهم من تقاربات وتباعدات عن المنهج الإسلامي
أليس من الأولى أن نتعاون مع الدعاة إلى الله عز وجل في القواسم المشتركة بيننا وبينهم وهي كثيرة والحمد لله
وإذا كنا ننكر ذاتنا ونتنازل عن هوية جماعتنا ونقبل أن نتحد في هيئة واحدة مع بعض الأحزاب أليس من الأولى ان نتنازل عن هذه الهوية حينما يكون
البديل هو أن يعمل الجميع بإسم الإسلام
هذه الكلمات لا أجد لها دافعا إلا الحب في الله لكل الإخوان المسلمين إخوانا كانو أو سلفيين
وهذه الكلمات موجهة لكل العاملين في مجال الدعوة الإسلامية على اختلاف اتجاهاتهم وأفكارهم وأساليبهم في الدعوة إلى الله عز وجل
أختم بأطيب الكلام : (( إن في ذلك لآية لمن كان له قلب أو ألقى السمع وهو شهيد ))
(( فستذكرون ما أقول لكم وأفوض أمرى إلى الله ))
(( وآخر دعوانا أن الحمد لله رب العالمين ))

5- العيد فرحة بقى وكل سنة وانتو طيبين

السلام عليكم ورحمة الله وبركاته
الأول كل سنة وانتو طبيبين بمناسبة عيد الأضحى المبارك ربنا يعيده علينا جميعا بكل خير
التدوينة دي فيها بقى أخبار صلاة العيد من الزقازيق - شرقية معلش اتأخرت شوية بسبب نقطاع النت وظروف سفر سامحونا
صلاة العيد كانت في استاد الزقازيق اللى جنب جامع الفتح
عدد المصلين كان كويس ويمكن أكتر من عيد الفطر اللى فات والغريب إن عدد الرجالة كان أقل من عدد الستات
الإخوان السنادي كان لهم شوية حركات مش عارف إيه لازمتها
مثلا اتأخروا قوي في رفع اللافتات عن كل سنة
ومفيش ولا واحد لبس قميص مكتوب عليه الإخوان المسلمين زي ما بيعملوا كل سنة وبرضوا مش عارف ليه
أما بقى الجماعة بتوع الحزب الوطني فالسنادي كان لهم شوية حركات برضوا ملهاش لازمة
مثلا بين كل واحد والتاني متر علشان ياخد المكان كله ويبقى مفيش مكان للإخوان
وبعدين الإخوان لهم كل سنة حلقة نشيد بعد ما الناس بتخلص صلاة بيقف الإخوان وينشدوا شوية أناشيد وبعدين يختموا ويمشوا
المرة دي الحزب الوطني أجر واحد بتاع دي جي مخصوص علشان يشتغل ربع ساعة بعد الصلاة علشان الإخوان ميعملوش حلقة النشيد
وال دي جي عليه دايره في الصورة دي

بس على مين
احنا في الأول اترددنا نعمل الحلقة ولا لأ وقعدنا في الموضوع ده بتاع ربع ساعة
والناس واقفة تتلفت بيدوروا على الحلقة ومش عارفين يلاقوها
في الآخر عملناها وطلعت أحسن من كل سنة لأن فيه ناس كتير جات تشوف مين اللى بيزعقوا والـ دي جي شغال وكان العدد كبير والحمد لله
بس للأسف مكانش فيه فرصة إن أنا أصور حلقة النشيد علشان الكاميرا مش كانت معايا

أسيبكم مع الصور

دي صور أنا اللى مصورها

باقي الصور موجودة على موقع شرقية أون لاين ممكن تشوفوها هناك

4- مكتوب فى شهادة ميلادى مصرى

ايوة بحبها
بشتم فيها و اعزها
بشم مع هواها ترابها
و برضة بحبها
بستنشق دخنها فى عطرها
بعشق حواريها و شوارعها و ظلها
لجوامعها و كنايسها و معابدها بشتاق لها
لكل ركن و كل حبة رمل فى حضنها
بحب الفراعنة و المماليك و البورسعيدية
بحب الاهلى و الزمالك و الاسماعلاوية
وبحب السوايسة و الداميطة و المحلاوية
من الصعيد جنوبا الى المتوسط شمالا
بحلم أضمها
انت لسه بتسألنى بحبها
ايوة بحبها و بعشق اهلها
و حفضل أحبها
حتى لو ظلمنى ناس منها
حتى لو ضربنى ظابط من أمنها
حتى لو زاد الفساد و طال الزاد
و قل الخير فى حجرها
حتى لو ملقيتش اللقمة فى ارضها
حتى لو اتحشرت فى المترو بحبها
حتى لو وقفت فى اشارتها ربع قرن
بحبهاجوعت ولا شبعت بحبها
بحب البلد دى بكدبها و صدقها
بمجدها و عزتها بجيشها و شعبها
سألونى و أيش حلمك
قلت أموت فى رملها

الكلام ده مش بتاعي ده بتاع أحمد بتاع مدونة أنا الشعب واللنك في الجنب على يمينك طبعا الكلام جميل وكل حاجة بس لو سألوني أنا بحلم بإيه أقول أحلم إن أنا أعيش فيها واموت في الارض اللى جنبها ( في المسجد الاقصى ) لأني أتمنى أن اكون من اهل هذا الحديث (( لا يزال طائفة من أمتي على الحق ظاهرين لا يضرهم من خالفهم قالوا أين هم يا رسول الله قال ببيت المقدس وأكناف بيت المقدس ))

كل سنة وانتو طيبين وبخير يا جماعة وإن شاء الله السنة الجاية تكونوا واقفين على جبل عرفة ... آه صحيح ... بمناسبة عرفه متنسوش تصوموا اليوم ده وتدعو لأخوكم مصعب على الفطار

3- الحب يا قلبي 2

نكمل سيرة الحب اللى انفتحت

كنا فين بقى

آه ... كنا عند الحب اللى تاعب الواحد

ليه بقى انا تعبان

لما تلاقي اللى انت بتحبها بتكلم ولاد عندا فيك وبتهزر مع ولاد عندا فيك ومفيش مشكلة يكون رقم موبايلها مع نص ولاد الدفعة برضو عندا فيك يبقى لازم تفرقع وتتفقع .

ممكن تتفقع علشان بتغير على الإنسانة اللى انت بتحبها ومش عاوز حد يقرب منها

ممكن برضو تتفقفع علشان بتحس في بعض الأحيان إنك حبيت واحدة غلط ( من الآخر : نشنت يا فالح )

ممكن برضو تتفقع لأنك شايف قدامك ولا مؤاخذه واحدة هبلة بتضر نفسها عندا فيك انت وبتعمل كل اللى هي بتعمله بدافع العند رغم اقتناعها إن كل اللى هي بتعمله غلط ومش ينفع .

طيب والحل يا دماغي ؟

رد دماغي وقال :

أول حاجة : انت فعلا اخترت غلط وكان المفروض قبل ما تفكر بقلبك تفكر بعقلك وتحدد مواصفات مطلوبة في اللى انت عاوزها تكون شريكة حياتك وبعدين تدور علي المواصفات دي مش تقع قدام أول مطب .

ثاني حاجة : لو عايز تخف فعلا من التعب ده يبقى المفروض تبعد تماما ولو مش ينفع يبقى تقلل على قد ما تقدر من أي فرصة تلمحوا فيها بعض حتى .

طبعا مش محتاج أقول إن ثالث حاجة : إنكم لو بتكلموا بعض تفصل تماما الكلام ده وتنهيه علشان كل ما تتكلموا مع بعض حتى ولو في الدين عم إبليس هيشوف شغله وإبليس ده الكوتشي ( اقصد الكوتش : المدرب يعني ) بتاع فريق الشياطين فمحدش هيعرف يغلبه .

أنا خدت الكلمتين دول وبدأت أفكر فيهم وأنا بشرب شاي بالنعناع علشان أعرف أمخمخ ووصلت لنتائج زي الفل ممكن أقولها لكم بعدين علشان مش أطول عليكم أكتر من كده علشان أن حاسس إن أنتم زهقتم

كفاية كده

والسلام عليكم ورحمة الله وبركاته

3- الحب يا قلبي

قال إيه واحد صاحبي بيقول الحب حرام ومينفعش واحد يحب واحدة قبل الجواز .

زي ما يكون الحب ده زرار بندوس عليه الواحد يقعد يحب على روحه وندوس عليه تاني الواحد يبطل يحب برضو على روحه .

بصو يا جماعة الخير : أنا هقول رأيي أنا مش رأي حد تاني وممكن يكون صح وممكن يكون غلط .

أنا شايف إن الحب ده إحساس ( شعور يعني ) ومحدش بيملك إحساسه وأنا عاوز أسأل سؤال : لو واحد حاسس إنه بردان ينفع نقول له غلط متحسش إنك بردان ؟

كده برضو مينفعش واحد حاسس بالحب نقوله متحسش دلوقتي علشان لو حسيت يبقى انت كده بتعمل حاجة حرام ، إنما بقى لو واحد بسبب الحب (الإحساس) ده قعد يصاحب ويتكلم في التليفون ويقزقز لب على الكورنيش كل يوم خميس ده كده هو اللى غلط وهو ده اللي حرام .

أصل الحكاية إن الحبايب المفروض يخافوا على بعض ويحافظوا على سمعة بعض إنما إن أنا أضيع سمعة النبت اللى بحبها يبقى أنا كده أصلا كداب ومش بحبها .

أنا من زمان قوى وأنا بحب وكل شوية عم الشباب إبليس يزن على دماغ الواحد : يا ابني روح قلها على الأقل علشان تحجزها ليك ومحدش تاني يخطفها منك .

وممكن كنت فعلا أعمل كده والفرص كانت كتير فعلا لكن الحمد لله جت سليمة ، لكن هي غلطة واحدة الواحد عملها من سنتين وبيحصد نتيجتها لحد دلوقتي .

ممكن أكون حبيت علشان كان عندي ظروف أو أزمات وكنت محتاج أي مخرج لكن المشكلة إن الحب ده لو كان في الأول وهم دلوقتي بقى حقيقة والواحد دلوقتى تعبان بسبب الحب ده .

تعبان ليه بقى هقوله كمان ساعة ونص مثلا علشان خلاص الجمعة على وشك تتصلى والواحد برضو لازم يحافظ على الصلاة .

ولغاية ما نتقابل الولاد ينزلوا يصلوا والبنات يشربوا .... ( كباية شاي ) (*_*)

والسلام مسك الختام

2 - هو أنا ليه من الإخوان ؟

واحد صاحبي بيسألني انت ليه بقيت من الإخوان قلت له : في الحقيقة مش عارف يمكن علشان أبويا كده فانا بقيت كده ؟

الحقيقة أنا نفسي مش اقتنعت بالإجابة علشان كده قررت أبحث عن إجابة للسؤال في ذات الوقت اللى أنا بمارس فيه هوايتي المفضلة : كباية الشاي .

كباية شاي وتقعد تقرا هتفهم حاجات كتير قوي وده اللى أنا عملته وبعد إسبوعين من الشاي والقراية وصلت لنتيجة كويسة جدا .

النتيجة دي كتبتها في بحث من خمسين صفحة والصفحة دي بقى هي اختصار للخمسين صفحة .

أنا مسلم يبقى لازم أدعي الناس لديني علشان الله عز وجل قال : " فلولا نفر من كل فرقة منهم طائفة ليتفقهوا في الدين وينذروا قومهم إذا رجعوا إليهم " .

وطالما أنا هشتغل في الدعوة إلى الله يبقى الأحسن ليا إني أكون في جماعة علشان الشغل يبقى منظم وواقعي .

لما بدأت أدور على الجماعات ( الإسلامية المعتدلة ) لقيت جماعتين : الإخوان المسلمين والسلفيين وبدأت أقرأ عن كل جماعة في كتبها وفي النهاية اخترلات الإخوان .

ليه بقى اخترت الإخوان ؟

علشان الأسباب دي :

1- لأن الإخوان من أول الجماعات الإسلامية الموجودة في مصر .

2- لأن الإخوان فعلا ناس منظمة وبتشتغل بنظام واضح .

3- لأن الإخوان كلمتهم واحدة مش كل مجموعة لها شيخ بتمشي وراه .

4- لأن الإخوان لهم أهداف واضحة ومحددة وعايزين يحققوها .

5- لأن الإخوان ليهم مباديء واضحة ومحددة واللى عايز يكون من الإخوان ما عليه إلا إنه يؤمن بالمباديء دي .

6- لأن الإخوان في كتير من الأحيان بيقبلوا بوجود الآراء المختلفة معاهم ومش بيقولوا إن الآراء التانية غلط × غلط زي ما ناس تانية بتعمل .

أنا مش بقول الكلام ده علشان الناس تقول : الله الإخوان طلعوا حلوين يلا بقى نكون من الإخوان .

أنا بقول الكلام ده علشان سببين :

الأول : إن الكل يعرف أنا بقيت من الإخوان إزاي، ممكن أكون أنا قيمتي قليلة بين المدونين وممكن بين الناس كلها كمان لكن الواحد بيحس بسعادة وراحة لما يقول اللى جواه ويفضفض .

الثاني : علشان الناس كلها تعرف إن الإخوان المسلمين ناس لها فكر ولها نظام وحتى لو كل الناس مختلفة معاهم مش ينفع نطردهم من البلد دي ونقول البلد دي ملكمش مكان فيها لأن البلد للكل المسلمين والمسيحيين والإخوان والحزب الوطني والسلفيين والصوفيين كلنا لازم نقبل بعض ونقر بوجود كل الناس وبعد كده ننصح بعض بالذوق ويبقى كده عملنا اللى علينا .

والسلام عليكم ورحمة الله وبركاته

1- أول كباية شاي

السلام عليكم ورحمة الله وبركاته
أنا مصعب من مصر
ودي المدونة بتاعتي وإن شاء الله تعجبكم
الحقيقة انا سميت مدونتي كباية شاي لأني لقت إن حل مشكلة البلد دي يكمن في كباية الشاي
يعني من الآخر كده
احنا محتاجين نقعد ونتكلم مع بعض
الكل يقعد ويتكلم وبالمرة نشرب كباية شاي
محتاجين نتفاهم البلد دي بتاعة مين بالظبط
بتاعة المسيحيين
ولا بتاعة المسلمين .
بتاعة الحزب الوطني
ولا الوفد
ولا التجمع
بتاعة الأهلي ولا الزمالك ؟
بتاعة الإخوان ولا السلفيين
محتاجين نشرب شاي سوا ونقعد ونتكلم ونعيش ونبدع علشان نعرف يكون لينا مكان في دنيا الوحوش
كفاية كده النهاردة
والسلام مسك الختام